Biblioteca de literatura infantil e xuvenil

Páxina que contén un catálogo de libros infantís e xuvenís galegos con sinopse argumental e datos de edición. Inclúe desde os clásicos ás novidades do presente ano

Libros mais lidos polo alumnado de 3º ciclo

Nacho Pérez: Alba, unha aprendiz de meiga

A protagonista, Alba, é unha aprendiza de meiga que narra os comezos do seu proceso de aprendizaxe para se converter nunha meiga de pés a cabeza. Para isto, Alba terá que aprender e superar unha serie de probas que están escritas no Libro Secreto das Meigas. Entre outras, non poderá desvela-la súa identidade, emprega-los seus poderes en beneficio propio ou considerarse superior ós demais seres humanos. Deberá, así mesmo, coñece-la historia dos seus antepasados, aprender da natureza, ser fiel e levar sempre consigo o cofre de primeiros auxilios cos instrumentos imprescindibles.Na historia, Alba intenta conectar co lectorado e compartir con el tódolos seus secretos, coñecementos e experiencias: explica cáles son as diferencias entre meigas, bruxas, curandeiras, compoñedoras, menciñeiras e adiviñas; ofrece unha detallada descrición da súa familia e dos seus amigos Anxo e Adela; pide a colaboración dos lectores e lectoras na súa relación con Anxo e proponlles unha serie de xeroglíficos e preguntas ós que deberán atopar resposta co emprego da súa imaxinación

Manuel Rivas: Bala perdida

Relato infantil que se adapta ós esquemas clásicos das narracións de aventuras protagonizadas por piratas, actualizando o xénero mediante a inserción de referencias que o sitúan de cheo nos nosos tempos. A historia transcorre nunha pequena cidade chamada Atlán, na Costa da Morte. O heroe, Bala Perdida, un pirata con pata de pao, posúe unha estricta conciencia que lle obriga a devolver un tesouro tinguido de sangue: o ouro que os nazis roubaron ós xudeus. Bala Perdida contacta coa redactora dun xornal de Atlán, o Celtic News, Rosa Ribeiro O´Flaherty, para que o axude. Tras moitas aventuras, o tesouro volve a mans dos seus verdadeiros donos e ademais descóbrese que o pirata agocha un bo corzazón e moitos lazos que o unen a Rosa.

Libros mais lidos polo alumnado do 2º ciclo

Fina Rouco: ¡Ai, cando llo conte a Uxía...!

As vacacións de Nadal en Tunicia co seu pai convertéronse nunha dobre aventura para Ana. Ademais das sorpresas continuas de turista occidental, a rapaza viuse metida de cheo no caso do secuestro dun príncipe por uns narcotraficantes. Se a iso lle engadimos a súa amizade con Abdullah e o coñecemento dun vello arqueólogo en cadeira de rodas á busca das ruínas dun palacio, sáenlle a Ana unhas vacacións tan apaixonantes que ninguén llo vai crer cando o conte. Só unha persoa, a súa mellor amiga, Uxía.

Mariano Vara: O amigo que veu do mar

Este conto é a historia dun neno que atopa unha foca na praia e inicia con ela unha amizade. Pero a foca é capturada por uns pescadores que lla venden ao propietario dun parque zoolóxico. Xoán, o rapaz, quere liberar a súa amiga e, despois de varios intentos fracasados, consegue o seu propósito coa axuda dos seus amigos.Finalmente a foca recupera a liberdade e é devolta ao mar.O relato está precedido pola resposta que o xefe indio Seattle lle deu no ano 1854 ao Presidente de Estados Unidos, Pierce Franklin, cando este lle propuxo mercar as súas terras e crear unha reserva para que nela vivisen os indíxenas.

Libros mais lidos polo alumnado de 1º ciclo

Cando remata o verán, as bolboretas métense polo buraco dunha árbore e van á súa casa debaixo da terra, onde gardan o seu traxe alado. Alí preparan cores voadoras secretas coas que á noitiña pintan as follas das árbores, que logo levantan o voo. Despois agachan a semente das flores, destapan a cántara dos ventos, engordan as nubes bebés con mamadeiras de orballo e a algunhas aliméntanas con leite de algodón para que chovan neve. Feito o traballo, compran lambetadas no súper das formigas e celebran un banquete no que non falta de nada.


Xoán Babarro: O arco da vella
Era unha vez un sol brillante e unha gorda nube branda que o tapa. Por iso ela ten frío e chora pingas mil sobre o río. Como o sol quere ver esa chuviña, pinta co pincel de farol un grande arco de cores: é o arco da vella, que pasa polos regos e salta polos montes. Escóndese nos cabaliños dun carrusel, para que a nena e o neno xoguen con el.Historia en verso para primeiros lectores con mínimo texto rimado, que alterna nas páxinas con ilustracións a toda cor.

Letras galegas 2009

Deixamos este vídeo sobre Ramón Piñeiro, realizado polos colexios CPI San Vicente de A Baña e o CPI dos Dices de Roi.